Вратете ги изгубените податоци со MiniTool PDR

Порано или подоцна, сите сме ја доживеале немилата ситуација кога ненамерно ќе избришеме некој важен документ, хард дискот ќе нѝ откаже или пак ќе извршиме формат само за да се освестиме дека со во процесот сме изгубиле и стотици селфи фотографии. Во случај да немате направено бекап (на облак) може да направите една од две работи. Со оглед на тоа дека плачењето не е опција, ви препорачуваме да ја преземете и инсталирате алатката MiniTool Power Data Recovery Free 8. Оваа софтверско решение се одликува со долго име, непостоечка цена за користење и опција да ви ги врати изгубените податоци без да посегнувате по лексилиумот.

MiniTool PDR невообичаено едноставна алатка за користење. Она што бара од вас е да ја изберете направата во која сметате дека изгубените фајлови се наоѓале и да почекате да се изврши пребарувањето. По првичниот степен на скенирање, ќе добиете листа од работи кои се ископани од најдлабоките астрални ровови на хард дискот, како и можност за нивно извлекување во светот на живите.

Бесплатната верзија на MiniTool PDR ви дозволува да вратите податоци чија максимална тежина не смее да е над 1GB, но, таквите рестрикции воошто не се трн во окото, особено доколку бељата се случила со документи, а не Blu-ray филмови.

Најновата осма верзија има нов, подобар кориснички интерфејст. Зад хаубата се крие значително пооптимизиран енџин за побрзо извлекување на податоците. За пофалба е тоа што, сега, можете да го прекинете скенирањето во моментот кога ќе го здогледате саканиот фајл на листата која се освежува во реално време. Дополнително, прикажаните фајлови можат да се извлечат додека алатката и понатаму го скенира хард дискот.