Интервју: UpShift – амерички стартап со инвестиција од 4 милиони USD, искодиран целосно во Скопје

Upshift е платформа која на компаниите во САД им овозможува да пронајдат работници за флексибилни работни позиции за кои е потребно физичко присуство. Благодарение на ригорозната селекција вработените преку платформата во 95 отсто од случаите успешно ја завршиле работата. Оваа бројка е и поимпресивна во споредба со просекот за секторот кој е 40%. Она што е исто интересно за овој стартап е дека техничката страна на приказната – софтверот, одржувањето и надградбите целосно се прават во Скопје.

Upshift официјално е основан на 2-ри мај 2016 во Синсинати, Охајо, а веќе работат во 18 градови, во 8 држави во САД. Основачи на компанијата се Александар Пантич, Никола Јордановски и Стив Аневски. Во две инвестициски рунди Upshift успеа да собере 4 милиони долари. Во „Seed“ инвестицискиот циклус во 2019 собраа 1,3 милиони од 2 инвеститори Data Point Capital и Rev1 Venture. Минатата година во „Series A“- циклусот од Data Point Capital, Rev1 Venture и Indeed собраа уште 2,8 милиони долари.

За развојот и идните планови на Upshift разговаравме со ко-основачите Алекс Пантич (COO) и Никола Јордановски (СТО) на компанијата.

Што е Upshift и како функционира?

Никола: Upshift е on-demand платформа која го овозможува спојувањето на понудата и побарувачката, кога се во прашање флексибилните работни позиции во САД.  Преку нашиот продукт бизнисите имаат можност на многу поефикасен и полесен начин да ја пронајдат и ангажираат потребната работна сила. Дополнително, во согласност со нивните потреби им се нуди можност да привлечат и создадат лојални вработени, односно вработени кои во нивниот бизнис би се задржале на подолг рок и би сакале да работат полно работно време.

Од друга страна, кога зборуваме за Upshifter-ите (корисниците на нашата апликација), најголемиот бенефит за нив го согледуваме во обезбедениот пристап кон огромен број на флексибилни можности за работа. Секој апшифтер одлучува која индустрија и работна позиција е соодветна за него, колку часа и каде, односно во кој бизнис би сакал да работи. Пред аплицирање на конкретното работно место, секој корисник може да ги погледне сите детали за самата работа (објавен shift) и врз основа на понудените информации, да донесе одлука колку таа работа одговара на неговиот распоред, односно дали ги задоволува неговите барања и дали воопшто ќе аплицира.

Од каде се роди идејата за еден ваков сервис?

Алекс: The origin story прашањето е секогаш најинтересно за нас. Истото ни помага да се вратиме на самиот почеток и да споредиме каде сме биле, каде сме сега, па уште помотивиранo да размислуваме и за тоа каде се движиме понатаму.

Идејата за Upshift всушност потекнува од нашиот CEO, Стив Аневски кој своевремено раководеше со неколку ресторани. Од неговото лично искуство и потешкотии со кои што се соочувал при пронаоѓањето на соодветен персонал, започнавме да размислуваме и да трагаме по решение.

Уште од самиот почеток се водевме од тоа дека за секој проблем, секогаш постои најмалку едно најсоодветно решение, па така постепено се роди и заеднички се развиваше идејата за UPSHIFT. Скоро по почетокот, сфативме дека покрај рестораните, од нашето понудено решение можат да извлечат значаен бенефит и многу други индустрии кои трагаат по вработени, а се во можност да понудат сосема флексибилно или половина работно време.

Стартапот постои од 2015 и според вашите онлајн презентации, имате значителен број на корисници, дали веќе успевате да остварите заработка и да го поставите Upshift како профитабилен бизнис?

Алекс: Да. За волја на вистината и секако на наше огромно задоволство, Upshift стана профитабилен бизнис во 2019 година. Како и кај секој стартап, патот до профитабилноста е неизвесен, трнлив, а од друга страна пак толку возбудлив. Гледано од денешна перспектива, она што нас нè донесе до оваа моментална точка на развој е конзистентноста и упорноста да останеме на зацртаната патека која ја поставивме уште од самиот почеток и да научиме како на што подобар начин да ги искористиме придобивките од ниските оперативни трошоци, нешто што секако е од големо значење за секој бизнис.

Кои индустрии ги покриваат шифтерите на Upshift? Кој е процесот при избор на индустрии кои ги додавате?

Никола: Во моментот, Upshift се фокусира на понудените флексибилни работни позиции од страна на угостителскиот сектор, како и останати „лесни” индустриски сектори, како: производство, дистрибуција и друго. Главната причина, поради која првенствено започнавме да соработуваме со овие индустрии е видот, обемот и начинот на обука која е потребна пред апшифтерите да можат да започнат со работа. На овој начин, можеме да овозможиме полесна проверка на сите оние специфичните вештини, неопходни за самата работна позиција. Сметаме дека преку овој пристап дефинитивно, го олеснуваме и забрзуваме патот на корисниците до нивната посакувана работа.

Сепак, како што растеме на зададениот пазар, така се повеќе учиме за нашите апшифтери, па оттука честопати донесуваме одлука да се прошириме и да го олесниме пристапот и до оние поквалификувани работни позиции на пазарот.

Како се одвива процесот пријавување, ангажирање и исплата за апшифтерите? Постои ли некое филтрирање во потесни спецификации?

Алекс: Она што Upshifter-ите прво треба да го направат е тест за проценка на личноста, кој се спроведува online и истиот филтрира околу 35% од вкупниот број на апликанти. Ако го поминат тестот, тогаш треба да дојдат лично во една од нашите канцеларии за да направат ориентација/интервју. Особено внимаваме на развиениот time management кај секој од пријавените, односно доколку се случи апликантот да доцни повеќе од пет минути од закажаното време, истиот си заминува дома и треба повторно да закаже нов термин. Зошто го правиме ова? Мораме да бидеме сигурни дека кај нашиот клиент ќе пристигне кандидат кој максимално ги почитува правилата за работа. Не смееме никако да дозволиме истиот да  доцни на своето работно место.

Битно е да се истакне дека само околу 12% од апликантите поминуваат низ целиот наш процес на скрининг. Откако ќе станат дел од платформата, тие во првите две недели добиваат плата на неделна основа, а потоа можат самостојно да одлучат дали сакаат да бидат платени дневно, односно по секоја смена која што ќе ја изработат.

Кои канали за маркетинг ги користите за привлекување на кадар, а кои за привлекување на компании да објават огласи? Од кој канал сте најзадоволни?

Никола: За да ги привлечеме потенцијалните кадри или како што ние би сакале да ги наречеме нашите апшифтери, ги користиме оние традиционални канали, односно емитување на телевизиски и радио реклами. Секако, главниот акцент е поставен на дигиталниот маркетинг, како и на голем број различни дигитални „job boards“. Сите онлајн алатки и канали на комуникација кои што ги користиме се внимателно избрани и прилагодени согласно карактеристиките на конкретниот пазар. Нешто што е битно да се истакне е дека од самиот почеток, на сите наши официјални канали на социјалните медиуми, еднаш неделно се прогласува и објавува Upshifter of the Week. На овој начин сакаме да им оддадеме признание на нашите лојални корисници кои на неделно ниво работеле најголем број на часови преку нашата апликација. Тоа што нè радува е што луѓето своеволно и самостојно сакаат да го споделат нивното искуство со Upshift, а сето тоа секако води до ширење на еден позитивен word of mouth и постигнување на огромен ефект.

Додека за привлекување на компаниите, согласно мислењето на нашиот „sales“ тим, најголем ефект до сега забележуваме од остварување на директната продажба (cold calling).

UpShift засега функционира во САД, има ли планови за проширување на други пазари?

Алекс: Во моментот нашиот план е да продолжиме да работиме во САД екслузивно. Пазарот е навистина преголем, а ние моментално оперираме само во 8 федерални држави што значи дека дефинитивно имаме уште многу голем простор за раст и развој. Понатаму, кога овој раст ќе го оствариме онака како што планираме и посакуваме, секако наш логичен избор ќе биде проширувањето и надвор од границите на САД.  Проширувањето надвор од САД е нешто што досега многу пати го имаме разгледувано, но сепак треба да се напомене дека многу голем дел од сето тоа зависи од самиот правен систем на конкретните таргет држави каде што би се прошириле, бидејќи многу држави имаат различна легислатива кога зборуваме за работа исплатена по саат и ваквиот начин на работа честопати е тежок за имплементирање.

Како пандемијата влијае/влијаеше на Upshift? Со оглед на тоа дека сепак е потребно физичко присуство на работниците успеавте ли да пронајдете некоја функционалност која овозможува побезбедна работа?

Никола: Како и сите компании во светов и ние дефинитивно ја осетивме корона-кризата, особено во угостителскиот сектор каде што бизнисот опадна за околу 90% преку ноќ. Она што овозможи нашиот бизнис да продолжи со планираното темпо се нашите клиенти од индустрискиот сектор, кои пак скоро и ја дуплираа побарувачката. Па така, како резултат на кризата, се обидовме да се адаптираме на новонастаната ситуација што е можно побрзо и направивме пивот каде што тимот за продажба постави поголем фокус на клиентите од овој сектор. Дополнително, на клиентите им понудивме и електростатични апарати за дезинфекција преку нашата тогаш новоотворена компанија Puretech. Како полека почна да се „разрешува” корона кризата така и ние прекинавме со работа на Puretech, што секако беше соодветен одговор и ни донесе голем дел од приходите во тие месеци.

Алекс Пантич (лево) и Никола Јордановски (десно)

Платформата е целосно изработена во Македонија, што tech stack користите?

Никола: Да, платформата целосно ја изработивме и сè уште ја надградуваме во канцеларијата во Скопје. Особено сме многу горди на фактот дека токму овој софтвер има Made in Macedonia налепница.

Моментално платформата е всушност збир на многу проекти и секој тим си бира различни tech stacks па ќе наведеме неколку. The main tech-stacks of choice е PHP(Laravel), AWS, ReactJS, како и React Native меѓу многуте технологии што ги користиме.

Кој е последниот „feature“ кој го додадовте?

Никола: Бидејќи сме платформа во која изработените саати и дневниците се помеѓу клучните „features“ секогаш посветуваме значајно време во пронаоѓање на различни начини, како да се усоврши делот на фактурирањето и процесот на наплата/исплата.

Меѓу последните надградби што ги додадовме беше креирање на целосен систем за следење и модифицирање на фактурите, кој ќе го унапреди работниот процес на нашиот finance тим. Претходно сето тоа се правеше преку користење на трети софтвери или мануелно, додека сега и самите клиенти имаат олеснет и побрз пристап до истото.

Кој е последниот баг или downtime кој те извади од кожа и како го решивте?

Никола: Ах, мислам дека како и секој продукт, приказните за багови се меѓу оние каде што можеме да научиме најмногу и да се потсетиме на она што уште од студентски денови го учиме, дека една точка-запирка може да го однесе целиот систем во погрешна насока. Неодамна се соочивме со проблем кој дефинитивно нè извади од кожа, имено стануваше збор за слабост на една од библиотеките кои ги користиме во API-то, па не можејќи да ја откриеме грешката потрошивме неколку часови гледајќи во погрешно место. За среќа, следеше „еурека“ моментот и сфативме дека скоро бесполезно го најдовме проблемот бидејќи сега требаше да креираме pull request во библиотеката каде што беше лоциран проблемот (барање за вметнување на нов код со решение во source кодот на библиотеката) и да чекаме одобрување на истиот што за нас беше „waiting game“.

На средината на февруари имавте канцеларии во 17 градови во САД, се проширивте ли оттогаш?

Алекс: На 9-ти август годинава, се отвори и нашата нова канцеларија во Атланта. Водени од нашата амбиција за експанзија, секогаш со нетрпение го очекуваме секое следно отворање, односно секој следен влез на нов пазар. Нашата мисија е да го доближиме Upshift и да успееме сите оние бенефиции кои ги нудиме да ги овозможиме на што поголем број на луѓе и бизниси на територијата на САД.

Кои се плановите за развој на Upshift во Македонија? Како сте задоволни од локалниот кадар… која е една од најголемите предности, а кој најголем недостаток на локалната ИТ сцена и кадар?

Никола: Тимот на Upshift во Македонија, можеме да кажеме со сигурност дека е еден од најдобрите, односно најквалитетните тимови што може да изгради продукт на ова ниво. Досега, за нас дефинитивно најефикасен начин на привлекување и пронаоѓање на квалитетен кадар во државата беше вработувањето преку препорака. На тој начин го изградивме нашиот сегашен тим, кои во моментот брои 20 члена. Во следната година планираме со полна пареа да го развиваме и прошируваме тимот во државата.

Што се однесува до локалната ИТ сцена, не би можеле да идентификуваме конкретен недостаток, но би можеле да истакнеме што е тоа што претставува вистински предизвик како за нас, така и за секоја ИТ компанија.

Свесни сме дека индустријата во последните години расте со едно забрзано темпо, особено ако се земе во предвид квалитетниот ИТ кадар кој се продуцира, огромниот потенцијал за извоз, како и се поголемиот бројот на домашни, странски и компании од мешан капитал кои пак се во постојана потрага по Македонските Tech таленти.

Сето  тоа прави да се случува вистински локален „Talent War”, па оттука одржувањето на високо ниво на ангажираност и мотивираност кај нашиот тим претставува приоритет за нас. Едноставно кажано, водиме сметка да ја одржиме долгорочно лојалноста на тимот и секој член да има загарантирана можност за напредок и развој. Дополнително, UPSHIFT е една од ретките ИТ компании, која на своите вработени им нуди можност за учество во сопственичката структура на компанијата, преку поседување на сопствен пакет акции.

Она што можеби ни дава предност кога зборуваме за локалната ИТ сцена, е позитивниот feedback кој го добиваме од кадарот кога се спомнува моментот дека Upshift e комплетно македонски продукт, односно целосно изработен од нашиот тим во Скопје.

Коментирај

Вашата адреса за е-пошта нема да биде објавена.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*

Слични статии