Онлајн претстави: Театрите никогаш не биле толку „полни“

Доколку го следите хаштагот #СедиДома – кој добива на сѐ поголема популарност и кој ги промовира превентивните мерки за седење дома во самоизолација со цел спречување на пандемијата на коронавирусот COVID-19, ќе забележите интересни содржини и дискусии за тоа што треба да правите дури седите дома во карантин. Една од поинтересните теми којашто може да се пронајде при пребарување на овој хаштаг е тоа дека театрите – Македонскиот Народен Театар (МНТ), Театар Комедија како и кумановскиот театар неделава емитуваат дел од својот репертоар преку објавување на претставите на YouTube.

“Драга публико, бидејќи овие денови не можете да уживате во магијата на театарската игра, МНТ е секогаш тука за вас. Од утре со почеток од 20 часот стартуваме онлајн и во вашите домови, каде што бесплатно преку нашиот YouTube-канал можете да ги гледате претставите со следниот редослед: 18.3. „Сомнително лице“, 19.3. „Изгубени Германци“, 20.3. „Парите се отепувачка“, 23.3. „Да тргнеме Сењор“ и 24.3. „Мајсторот и Маргарита“. Останете дома, почитувајте ги препораките, бидете со нас и гледајте нѐ онлајн. “ – гласи веста објавена на страната на МНТ.

Додека претставите на МНТ се објавуваат на нивниот YouTube профил премиерно во закажаното време и потоа остануваат достапни за преглед, претставите емитувани од Театар Комедија се емитуваат во формат на “live stream” и по емитување не се достапни.

Интересен податок е дека претставата “Сомнително лице” објавена во среда, 18.03, досега има 54 000 прегледи, додека “Изгубени Германци” повеќе од 11 000 прегледи. И покрај тоа што станува збор за снимени претстави во 2007-ма и 2013-та година, со ваквите бројки може да заклучиме дека театарските сали никогаш не биле волку “полни”.

И покрај тоа што овој чекор на театрите е за поздрав, бидејќи на публиката која е заглавена дома им ја нуди бесплатно својата содржина и им овозможува да го пополнат своето слободно време, дел од гледачите го критикуваат овој чекор истакнувајќи дека театарските магија е изгубена кога претставите не се гледаат во живо. Дел од коментарите се дека тонот на самите претстави не е професионален и некои претстави се снимени од само еден кадар, но причината за тоа е што всушност, како што појаснуваат од МНТ на својот Facebook профил, станува збор за архивски снимки наменети единствено за архивите на театарот и дека единствената причина поради која ги објавуваат е вонредната ситуација.

Каде да ги гледате претставите

МНТ
Претставите на МНТ со гореспоменатиот репертоар може да ги гледате на YouTube профилот на МНТ на следниов линк, премиерно секој ден оваа недела од 20.00 часот.

ТЕАТАР КОМЕДИЈА
Претставите на Театар Комедија може да ги гледате премиерно и во моментот додека се емитува стримот на нивниот YouTube профил на следниов линк, со почеток од 21.30 ч.

ТЕАТАР КУМАНОВО
Видеата од претставите на кумановскиот театар се објавуваат на YouTube профилот Aleksandra M, но се поставени како “unlisted” (објаснување: можат да се гледаат само со директен линк). Досега се објавени следниве претстави: ,,Ревизор“ , „Бегај, еве ја жена ти 2″ и детската претстава ,,Волшебникот од ОЗ“.

СКОПЈЕ ТАНЦОВИОТ ТЕАТАР
Скопје танцовиот театар од 23.03.2020 година (понеделник) во периодот помеѓу 18:00 и 20:00 часот, ќе започне со бесплатно емитување на своите претстави на својот YouTube профил на следниов линк.

За пандемијата на коронавирусот COVID-19

Ажурирано на 25/03/2020

Што е коронавирусот COVID-19?

COVID-19 (коронавирусна болест 2019) е нова заразна вирусна дишна болест предизвикана од новиот коронавирус SARS-CoV-2. Името го добива по „боцките“ на неговата површина кои изгледаат како круна (корона). Коронавирусите можат да заразат и животни и луѓе и да предизвикаат симптоми што се движат од лесна настинка до тешка, животно загрозувачка пневмонија.

Колку е заразен вирусот?

Вирусот е екстремно заразен и се пренесува многу лесно од човек на човек, особено во затворени површини. Се пренесува по капличен пат - во мали капки кои ги прави заразениот човек кога дише, зборува, кашла или кива.

Каде е проширен вирусот?

Почнувајќи од првата епидемија во Кина, од декември 2019 до денес вирусот е проширен во над 140 земји, има заразено најмалку 462.000 луѓе и предизвикано над 20.800 смртни случаи. Според Светската здравствена организација се работи за пандемија. Моментално Европа и САД се соочуваат со нагол пораст на новозаболени. Вирусот е присутен и во Македонија од 26 февруари 2020.

Кои се симптомите?

За да се појават симптомите потребни се 2 до 14 дена. Најчести симптоми се покачена температура, сува кашлица, замор и потешкотии при дишењето. Најголемиот број заболени (околу 80%) имаат благи симптоми кои наликуваат на грип или лоша настинка. Некои луѓе воопшто не развиваат симптоми, но може да ја пренесат болеста на други.

Како да се заштитам себеси и другите?

Добар совет во време на пандемија е да се однесуваме како сите, па и самите да сме заразени. Ова значи, минимизирање на контактот со други луѓе и држење на дистанца од 1 до 2 метри, поретко излегување од дома, често и долго (до 20 секунди) миење на рацете и избегнување на допирање на лицето.

Каде да се информирам повеќе?

Во време на пандемија, а воедно и на лажни вести и clickbait тактики, бидете внимателни од каде конзумирате вести. IT.mk ви препорачува да ги следите официјалните сајтови и проверени извори на информации:

- Официјална веб-страна на Министерството за здравство
- Официјална веб-страна на Владата на РСМ
- Неофицијална страна поддржана од Министерството за здравство
- често ажурирана страница за моменталната состојба на пандемијата. За секоја земја има и посебна статија.

Прочитај повеќе

Коментирај

Вашата адреса за е-пошта нема да биде објавена.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*

Слични статии