Што е Torment: Tides of Numenera?
Torment: Tides of Numenera e RPG игра направена од inXile Entertainment и издадена од Techland Publishing за Microsoft Windows, OS X, Linux, Xbox One и PlayStation 4. Како духовен наследник на хитот од 1999 година, Planescape: Torment, играта е сместена во Нименера, фантазиско ремек дело од дизајнерот и писателот на table-top игри Манти Кук, најдобро познат за неговиот придонес во Dungeons & Dragons.
Откако беше целосно финансирана на кикстартер за само шест часа, Torment: Tides of Numenera стана вториот највисоко финансиран проект, со импресивна посвета на 4 милиони долари. На играта се започна со работа уште од март 2013 година и, иако беше предвидено да излезе по само една година, тимот реши да оди со повнимателен пристап и макотрпно работеше на играта сè до февруари 2017 година.
Осмислена со флексибилната моќ на енџинот Unity, играта се одвива од изометриска перспектива, потпомогната од 2.5D елементи. Играте со херој кој е отфрлен од бога, но постојано гонет од застрашувачко чудовиште. Низ 30-часовната кампања, поминувате низ бројни непредвидливи заплети и одлуки кои се вовлечени во навидум непресушни извори од текст. Вашиот пристап не само што го менува светот околу вас туку и ви доделува одредени поени кои, за возврат влијаат на начинот на кој одредени ликови реагираат на вас. Онаму каде што дипломатијата потфрлува, настапуваат битки со запазени turn-based правила.
Кои се inXile Entertainment?
inXile Entertainment е американско студио кое е основано од Брајан Фарго, а специјализира во создавање RPG игри. Нивната прва игра, The Bard’s Tale излезе две години по формирањето на студиото и успеа да ги заинтригира гејмерите со уникатната приказна и гејмплеј. По серија од неинспиративни наслови, претежно таргетирани до iOS публиката, тимот од педесетина вработени дури во 2014 година повторно блесна на сцената со нивната посвета на Wasteland 2 – Кикстартер проект кој произлезе како многу успешна формула и потврди уште еднаш дека inXile е исклучително квалитетно студио. Со исфрлување на финалната верзија на Torment: Tides of Numenera, тимот се посветува на изработката на The Bard’s Tale IV и Wasteland 3.
Што мисли светот за Torment: Tides of Numenera?
Со 83 Metascore поени и 73% позитивни рецензии на Steam, повеќе од јасно е дека Torment: Tides of Numenera е играта која повеќето фанови всушност и ја сакаа. GamingTrend ги оправдува нивните 95 поени со тоа што ја прикажува играта како модерен пристап на класичните RPG игри кој располага со впечатлива и оригинална приказна, но со форсиран и неинспиративен борбен систем. IGN Italia и даваат 91 поен и ветуваат дека доколку сте спремни да го издржите психолошкиот притисок тогаш Torment: Tides of Numenera ќе ве награди со незаборавно искуство. Game Revolution ја вовлекува во аргументите For Honor и објаснува дека како што забавата во For Honor произлегува од учењето како да се игра, во Torment: Tides of Numenera забавата произлегува од достигнување енциклопедиско знаење за целосно нов универзум преку вистинско и значајно донесување одлуки. Кога ќе земете сè предвид, ова е игра која има мајсторска приказна (GameCritics), пребогатa димензија во која комотно можете да се изгубите (God is a Geek) и одлична адаптација на бизарниот sci-fi свет на Манти Кук (4Players.de) кој за жал, разочарува со turn-based борбениот систем (IGN) бидејќи се потпира на застарени концепти и технологија (Metro GameCentral).
Што мислиме ние?
Со оглед на тоа што во самата игра има книги и книги од текст, Torment: Tides of Numenera е игра која наjвеќе ќе биде цената поради пишаниот збор, богатата историја и можноста за градење односи преку донесување критични одлуки, а не поради борбениот систем. Точно е дека борбениот дел не е ни приближно добар како приказната; одредени битки се развлекуваат до бесконечност и цело време се алудира на пропуштени шанси и неискористени потенцијали, но кога ќе земете во предвид дека поголемиот дел од битките можат да се избегнат само доколку внимавате на разговорите, Torment: Tides of Numenera зазема интересна димензија каде дополнително ве мотивира да внимавате на вашиот пристап кон луѓето. Во спротивно, ќе бидете казнети со неинспиративно долги и крајно здодевни битки. Нема никакво сомневање дека Torment: Tides of Numenera е прекрасна cRPG игра со која фановите на Planescape: Torment можат само да се гордеат, но оставете што ние мислиме…
Што мислите вие?
Кажете ни во коментарите, на друштвените мрежи или во гејминг секцијата на ИТ форум!
- Развивач: inXile Entertainment
- Издавач: Techland Publishing
- Режисер: Кевин Саундерс, Крисн Кинан
- Продуценти: Брајан Фарго
- Писател: Колим Меккомб, Гејвин Џургенс, Адам Хајн, Џорџ Цајтц, Марк Јохалем, Нејтан Лонг
- Композитор: Марк Морган
- Платформи: Microsoft Windows, OS X, Linux, Xbox One, PlayStation 4
- Излезена на: 24 февруари 2017
- Жанр: RPG
- Режими на игра: едно лицe
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
