Како МКхост #РаботиОдДома

Несомнено е дека коронавирусот COVID-19 има огромно влијание врз случувањата во светот. Веќе имавме текст за тоа како светските ИТ компании се справуваат со пандемијата и предизвиците кои ги носи.

Очекувано најголем дел од читателите беше позаинтересиран како со епидемијата се справуваат локалните компании. Па затоа, во серијал од повеќе текстови, насловен „Како [локална компанија] #РаботиОдДома“ ќе се обидеме да презентираме што прават најголем дел од ИТ компаниите кои се од Македонија или имаат канцеларии во Македонија.

Ова е праксата на најголемиот македонски хостинг провајдер и регистрар на .mk домени МКхост. МКхост постои цели 15 години на пазарот, претставувајќи „дом за веб сајт“ на секој корисник на кого му е потребно целосно онлајн решение. Со онлајн решенија креирани по светски стандарди, главниот фокус на МКхост се секогаш корисниците, заедно со постојана и брза професионална техничка поддршка. МКхост во изминативе години помогна на над 5.000 активни корисници – компании, организации и индивидуи да се појават на интернет со сопствени веб сајтови, а со тоа да го прошират својот бизнис национално и регионално.

За работата од далечина во состојба на пандемија разговаравме со Дарко Каранфилов, маркетинг аналитичар во МКхост.


Како се справувате со овие отежнати услови за работа?

Како компанија работиме целосно од дома веќе 13 месеци, започнувајќи од март 2020-та. Со оглед на тоа што и претходно имавме воведено делумно „remote“ работење, не ни беше многу тешко да ја направиме оваа трансформација. Од одлука до реализација ни беше потребен само еден викенд.

И во нормалното канцелариско работење претходно, веќе имавме имплементирано многу механизми преку кои следењето на работните процеси во МКхост беше возможно од било кое место и било кој уред.

Така што, од аспект на услови, овој тип на работење, освен недостатоци од типот на помала социјализација помеѓу тимот и циркулирање на идеи во реален простор, кои дефинитивно многу значат, исто така носи и свои предности – поголема флексибилност на вработените, подобро искористување на работното време, работење во персонализиран домашен простор, итн.

Какво е влијанието врз работата и клиентите?

Работата на МКхост доби сосема нови димензии во последнава година, но тоа воопшто не нѐ попречи во работата со клиенти. Освен состаноците кои наместо во канцеларија, сега ги одржуваме виртуелно, сите други процеси се одвиваат нормално.

Виртуелната координација на сите интерни тимови се оствари за многу брзо време, а резултатите на сите полиња се и повеќе од одлични.

Кои алатки ги користите за да ја олесните работата од дома?

Примарен извор за комуникација на сите тимови и вработени е Slack, преку кој правиме координација на сите останати алатки кои ги користиме за планирање и извршување на работните задачи – Jira, Trello, состаноци преку Google Meet…

Ги користиме сервисите на Google Workspace, а за интерна документација од помош ни се Confluence и GitLab. Исто така, имаме и повеќе интерни системи кои ги имаме развиено во текот на нашето постоење и ни се неопходни во квалитетната работа.

Кои се предизвиците при работа од дома?

Како што спомнавме и погоре, најголем предизвик е недостаток на социјализацијата, односно дружењето и размената на идеи помеѓу вработените. МКхост е компанија која се гради долги години и која има стабилен тим кој постојано расте, а во сите вакви случаи, тимот е поврзан меѓусебно, како за време на работното време, така и вон истото.

Кога се разделивме последниот пат со физичко работење во март 2020-та, си рековме дека се гледаме за неколку недели, но поминаа веќе цели 13 месеци откако влеговме во ваков „remote“ процес на работа. На секој виртуелен состанок на кој се слушаме заеднички со сите вработени, секогаш има коментари за „што побрзо да се видиме повторно заедно“.

Нешто што би сакале да додадете…

Се надеваме дека оваа ситуација ќе заврши што побрзо, и дека повторно ќе можеме да функционираме на физички начин.

Секако, тоа не значи дека „remote“ работењето треба целосно да престане, бидејќи како што видовме и овој начин на работа може да функционира одлично, а има и индивидуални предности за вработениот, особено во периоди кога треба да се завршат определен тип на задачи.

За пандемијата на коронавирусот COVID-19

Ажурирано на 25/03/2020

Што е коронавирусот COVID-19?

COVID-19 (коронавирусна болест 2019) е нова заразна вирусна дишна болест предизвикана од новиот коронавирус SARS-CoV-2. Името го добива по „боцките“ на неговата површина кои изгледаат како круна (корона). Коронавирусите можат да заразат и животни и луѓе и да предизвикаат симптоми што се движат од лесна настинка до тешка, животно загрозувачка пневмонија.

Колку е заразен вирусот?

Вирусот е екстремно заразен и се пренесува многу лесно од човек на човек, особено во затворени површини. Се пренесува по капличен пат - во мали капки кои ги прави заразениот човек кога дише, зборува, кашла или кива.

Каде е проширен вирусот?

Почнувајќи од првата епидемија во Кина, од декември 2019 до денес вирусот е проширен во над 140 земји, има заразено најмалку 462.000 луѓе и предизвикано над 20.800 смртни случаи. Според Светската здравствена организација се работи за пандемија. Моментално Европа и САД се соочуваат со нагол пораст на новозаболени. Вирусот е присутен и во Македонија од 26 февруари 2020.

Кои се симптомите?

За да се појават симптомите потребни се 2 до 14 дена. Најчести симптоми се покачена температура, сува кашлица, замор и потешкотии при дишењето. Најголемиот број заболени (околу 80%) имаат благи симптоми кои наликуваат на грип или лоша настинка. Некои луѓе воопшто не развиваат симптоми, но може да ја пренесат болеста на други.

Како да се заштитам себеси и другите?

Добар совет во време на пандемија е да се однесуваме како сите, па и самите да сме заразени. Ова значи, минимизирање на контактот со други луѓе и држење на дистанца од 1 до 2 метри, поретко излегување од дома, често и долго (до 20 секунди) миење на рацете и избегнување на допирање на лицето.

Каде да се информирам повеќе?

Во време на пандемија, а воедно и на лажни вести и clickbait тактики, бидете внимателни од каде конзумирате вести. IT.mk ви препорачува да ги следите официјалните сајтови и проверени извори на информации:

- Официјална веб-страна на Министерството за здравство
- Официјална веб-страна на Владата на РСМ
- Неофицијална страна поддржана од Министерството за здравство
- често ажурирана страница за моменталната состојба на пандемијата. За секоја земја има и посебна статија.

Прочитај повеќе

Коментирај

Вашата адреса за е-пошта нема да биде објавена.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*

Слични статии