Интервју со македонските тимови кои победија на Nordeus Hackathon 2013

Задачата на хакатонот на Nordeus, српска компанија чија игра Top Eleven има над 10-тина милиони корисници, е да се креира игра од нула за само 24 часа. Предизвикот e интензивен и тежок, но и инспиративен за трите македонски тимови кои отпатуваа во Белград, и изминатиов викенд, на 14 и 15-ти декември, ја истакнаа својата креативност пред искусното жири и другите конкурентни девет тимови од регионот. Сите креирани игри наскоро ќе бидат објавени на сајтот на Nordeus.

„Хакатоните не ретко се многу напорни бидејќи мора времето и проектот да се испланираат така што да може сé да се постигне во дадените временски и концентрациски рамки“, вели Кристијан Трајковски, еден од членовите на македонскиот тим Dark-1. „На крајот кога се прават последните промени сите се молат ништо да не тргне наопаку, да нема багови во крајниот билд, најчесто крајниот продукт не е најдобро истестиран поради временските ограничувања“.

Победничкиот тим Dark-1, составен од Кристијан, Ненад Стојановиќ, Марко Зарев и Симон Стојановски, сите студенти по информатички науки, успеа за само 24-часа да ја креираат најдобрата игра со мало роботче кое колонизира планети. Успехот, вели Кристијан, е што тимот веќе подолго време соработува заедно. Првиот собир беше на Wowzapp хакатонот лани, по што настапија на Global Game Jam во Скопје каде им дојде идеја за нова игра Odium, која ја развиваат во моментов, и сега во Белград каде што едноставно ги следеа темите за колонизација на хакатонот.

(Dark-1 го освои првото место на хакатонот)

Македонскиот талент беше истакнат и со наградата за најоригинална игра која ја освои вториот македонски тим Control, составен од Марио Ампов, Стојан Димитровски, Тамара Димитрова и Дамјан Лозановски, сите ИТ студенти. За тим кој првпат работи заедно важно беше да се избегне тензичната атмосфера, но и да се најде простор за дискусија која, иако траеше шест часа „без да се допре код“, резултираше во оригинална игра.

„Атмосферата и притисокот на времето бара постојана креативност и можност да ги споделиш своите идеи со тимот без да се создаде тензична атмосфера. Знаејќи дека секоја минута потрошена на бесцелни дискусии „ќе ти се врати“ покасно, бара подготвеност брзо да отфрлаш идеи“, вели Стојан. „Нормално дека е напорно. Но, доколку те интересира тоа и уживаш во таков вид на работа, напорот го оставаш пред врата и даваш сѐ од себе за подобра идеја и/или имплементација“.

(Clony на Control беше прогласена за најоригинална игра)

За третиот македонски тим – Muted, составен од студентите Никола Калемџиевски, Горјан Јовановски, Димитар Јованов и Бојан Јаневски, за жал немаше награда. Но, иако тие останаа со празни раце, сепак си одат од Белград со еден куп искуство. И веруваме дека сите три тимови, всушност сите 12 тимови кои учествуваа на хакатонот, може од тука само да станат подобри.

„Искуството да се учествува на еден ваков хакатон беше извонредно, од односот на менторите, до организираноста, до самите канцеларии (кои што најмногу ми се допаднаа поради whiteboard ѕидовите на кои можеш да пишуваш). Се запознавме со многу ентузијасти од целиот регион и имавме можност да покажеме што знаме да направиме во рок од 24 часа. Искуство секако дека стекнавме, бидејќи и при самото правење на играта, читаш и учиш, така да можноста да се учествува далеку ги надмашува наградите“, вели Горјан Јовановски од Muted.

(Muted не освои награда, но си одат со тон искуство)

Тоа што може да им застане на пат за понатамошен развој на тимовите, кои може да прераснат и во стартаи, за жал е што тимовите се враќаат во Македонија каде е тешко да се пробие една апликација, посебно една игра. Не се работи само за мотивацијата и квалитетот, туку повеќе за условите. Македонските програмери имаат потенцијал, вели Стојан од Control, но тоа што недостасува се алатките да се заработи од тој потенцијал.

„Мислам дека во Македонија има голем потенцијал за многу работи, вклучително и за развивање на видео игри. Но, проблемот е монетизацијата. Знаејќи дека тешко се добива профит од нешто за што е потребен добар тим, огромна мотивација и способност за имплементација, мислам дека е главната причина за неискористување на потенцијалот. Уште повеќе, знаејќи дека проблемот со монетизација е исклучиво технички, како ситуацијата со PayPal, Google Play Store и слично, мислам дека е дополнителна демотивација за било какви подвизи во гејминг сцената, или општо во било која област за развивање на софтвер наменет за поширок пазар“.

4 коментари на “Интервју со македонските тимови кои победија на Nordeus Hackathon 2013

  1. Честитики за победниците, а за монетизација на игрите – доколку се онлајн игри или игри со virtual goods – не се грижите, направете одличен краен продукт, постојат голем број на компании кои работат со Македонија и вршат исплати преку bank wire, и кои се грижат за редица други административни работи (како на пр. данок и даночни пријави во земјите од каде е купувачот) во замена за процент. Како пример, тука е SuperReward и редица други – едно мал search на google ќе извади голем број такви компании.

Коментирај

Вашата адреса за е-пошта нема да биде објавена.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

*

Слични статии