Иницијатива за покорисен PayPal во Македонија

Пред неколку години најпопуларниот сервис за онлјан плаќање PayPal објави дека конечно услугите ќе можат да се користат и во Македонија. Тогаш сите се израдувавме, но поради неусогласеност на законите PayPal може да понуди ограничена услуга.

Деновиве е актуелна нова иницијатива со која од Министерството за финансии се бара промена на законите и почеток на целосна PayPal услуга. Иницијативата започна од Login Systems, а сите заинтересирани со својот „потпис“ можат да дадат поддршка. Потписите заедно со писмото ќе бидат испратени до Министерството за финансии со копија до Народната банка на РМ, вицепремиерот задолжен за економски систем, министерството за информатичко општество и Министерството за економија.

Засега од Македонија, PayPal може да се користи единствено за купување надвор од македонските граници. Сепак постои реална потреба, а и интерес кај компаниите, за можност за купување од македонски продавници. Ова ќе овозможи онлајн плаќање од надвор, но и од Македонија, во локални продавници и компании. Доколку новата влада е сериозна околу заживувањето на е-трговијата овозможувањето на целосна PayPal услуга, треба да биде еден од приоритетите. Во спротивно PayPal ќе остане сервис со кој парите на граѓаните ќе се одливаат надвор од Македонија.

Го контактиравме г. Венко Глигоров основач и косопственик на Логин Системи од каде и започна оваа иницијатива, да ни објасни кои се проблемите поради кои PayPal не може во целост да ги понуди своите услуги.

Што е пречката што во моментов нема можност за плаќање со PayPal?

Според Пејпал, поголемите банки во Македнија не даваат зелено светло на Пејпал за да стартува сервисот во Македонија. Моите сознанија кажуваат дека во 2014 година се направени измени во регулативата од страна на НБРМ со што се дозволило постоење на виртуелни сметки за физички лица за плаќање (односно увоз) на производи преку Пејпал. Не е направена измена да може домашни субјекти, било физички или правни лица, да може да отворат сметки во банките, а тие да бидат поврзани со Пејпал. Кусо кажано, може да се купува преку Пејпал, но не може да се продава преку Пејпал – или увоз може, а извоз на македонски производи не може.

Бидејќи повеќето од работите задираат во доменот на работењето на НБРМ и банките, Владата може да иницира измени и да го менаџира процесот на овозможување на Пејпал. Исто така владата може да стимулира извоз на македонски производи преку Пејпал преку олеснување на постапката на логистичко-царински формалности, а и да ја засили комуникациската инфраструктура. Секако може да компензира и дел од трошоците што би ги имале извозниците при ваквата продажба – но ова не е задолжително. Основно е на пример Министерството за финансии да си го земе ова како проектна задача и да ги истурка работите до крај во рок од неколку месеци без премногу дебатирања и одолговлечувања. Во Европа, само Македонија и Црна Гора немаат Пејпал за продажба.

Што ќе се случипо усогласување на законот, конечната одлука останува на PayPal?

Како што ме информираа од Пејпал, тие секако се заинтересирани веднаш да се почне со работа. Нив како сервис им одговара сите земји во светот да имаат Пејпал сервис. Значи, Пејпал има одлука за Македонија и се чека зелено светло од банките, а банките чекаат на НБРМ. На потег е ми се чини Министерството за финансии во прв ред. Може да ја искористи приликата и да направи ревизија на платниот систем во Македонија кој како таков постои од 2000 година. Воведувањето на Пејпал ќе донесе убава свежина во понудата кај банките, а ќе се стимулираат претприемачите да мислат на продажбата во светот.